ՀՏՀ

Ի՞նչ պահանջներ են ներկայացվում դիմորդին:

«Բջջային հավելվածների ծրագրավորում» դասընթացին դիմելու համար դուք պետք է լինեք 14-16 տարեկան դպրոցական, ունենաք ՏՏ հմտություններ և մաթեմատիկայի համապատասխան մակարդակ՝ առցանց թեստն անցնելու համար։ Բացի այդ, դասընթացին մասնակցելու համար հարկավոր է ունենալ համակարգիչ կամ առցանց ուսուցման համար հարմար այլ սարք։
«Արհեստական բանականություն» դասընթացի դիմորդները պետք է լինեն 18-25 տարեկան, ուսանեն ՏՏ ոլորտի համալսարանական ծրագրերում, ունենան Python-ի բազային գիտելիքներ և բարձրագույն մաթեմատիկայի լավ իմացություն։

Անհրաժեշտ է նաև անգլերենի և ռուսերենի լավ իմացություն։

Ի՞նչ լեզվով ենք հայտադիմում ներկայացնելու:

Հայտադիմում ներկայացնելու գործընթացը ռուսերեն/անգլերեն է:

Ի՞նչ լեզվով են դասերը լինելու:
Դասավանդման լեզուն ռուսերենն է:
Ինչո՞ւ է դասավանդման լեզուն ռուսերենը:

Հայաստանում Սամսունգ ինովացիոն կամպուսը նոր նախաձեռնություն է, ուստի առայժմ առկա ուսումնական նյութերը ռուսերեն լեզվով են, քանի որ մշակվել են Ռուսաստանում: Հայերեն կամ անգլերեն տարբերակները դեռ առկա չեն:

Ինչպե՞ս դիմեմ ծրագրին:

Սեղմեք կայքի վերևի մասում գտնվող մենյուի «Գրանցվել» կոճակը և հետևեք քայլերին։

Կպատմե՞ք դիմելու գործընթացի մասին:
Գրանցվելուց հետո առցանց թեստ կհանձնեք: Թեստը հաջողությամբ հանձնելու դեպքում կանցնեք երկրորդ փուլ և կհրավիրվեք առցանց հարցազրույցի:
Ծրագրի թեստի համար նախապատրաստական նյութեր կա՞ն, որպեսզի պատրաստվեմ:

Ոչ:

Ե՞րբ կիմանամ՝ ընդունվել եմ, թե ոչ:
Հարցազրույցի ընթացքում կիմանաք արդյունքները հայտնելու վերջնաժամկետի մասին:
Որքա՞ն է տևում ծրագիրը:
Ծրագրի տևողությունը 132 դասաժամ է, շաբաթական 4 դասաժամ բաշխվածությամբ: Ծրագրի շրջանակում մասնակիցներն աշխատում են իրենց անհատական նախագծի վրա, որը ներկայացնում են դասընթացի ավարտին:
Ե՞րբ և որտե՞ղ են անցկացվելու դասերը:
Առկա դասերն անցկացվելու են հանգստյան օրերին UWC Դիլիջանի դպրոցում՝ Սամսունգի ժամանակակից տեխնիկայով համալրված համակարգչային լաբորատորիայում: Երբեմն էլ կլինեն հեռավար դասեր:
Ովքե՞ր են դասավանդում Սամսունգ ինովացիոն կամպուսում:
Մեզ մոտ դասավանդում են Սամսունգ Էլեկտրոնիքսի կողմից հավաստագրված ուսուցիչներ, ովքեր անցնում են ամենամյա վերապատրաստում բարձր մակարդակով:
Որքա՞ն է ուսման վարձը:

Սամսունգ ինովացիոն կամպուսը Սամսունգ Էլեկտրոնիքսի սոցիալական ծրագրերից է: Ուսուցումն անվճար է:

Ինչպե՞ս հասնեմ UWC Դիլիջանի դպրոց:
Ապահովվելու է տրանսպորտ Երևանից, Գյումրիից և Վանաձորից:
Ավարտական վկայական կստանա՞մ:
Այո, եթե բավարարեք բոլոր պահանջները:
Ո՞րն է դիմելու վերջնաժամկետը:
Հայտերի ընդունումը սկսվում է հունիսի կեսին։ Հետևեք սոցիալական ցանցերում մեր հայտարարություններին՝ յուրաքանչյուր տարվա ընդունելության ժամանակացույցին ծանոթանալու համար։
Ե՞րբ են դասերը սկսվելու:
Դասերը կսկսվեն սեպտեմբերին։ Հստակ ամսաթվերը կհայտարարվեն լրացուցիչ։
Դասացուցակը ե՞րբ կիմանամ:

Դասացուցակը կստանաք ծրագրի սկզբից մեկ շաբաթ առաջ էլեկտրոնային նամակով: Այն նաև կտեղադրվի myitschool.ru պորտալի Ձեր էջում, որի միջոցով գրանցվել էիք: